तेह्रथुम । लालीगुराँस नगरपालिकाले सञ्चालन गरेको वसन्तपुर नगर अस्पताल व्यवस्थित बन्दै गएको छ। पछिल्लो समयमा अस्पतालमा सेवा सुविधा र विशेषज्ञ चिकित्सकको सुविधामात्रै थपिएको छैन, बिरामीको संख्या पनि उल्लेख्य बढेको छ।
अस्पतालमा दैनिक ओपीडी सेवाअन्तर्गत पेट, छाती/निमोनिया, दम, प्रेसर, सुगर, टाइफाइड, स्त्रीसम्बन्धी रोगहरू, प्रसूति सेवा, हातखुट्टा भाँचिएको प्लाष्टर र आँखासम्बन्धी रोगहरूको परीक्षण र उपचार सेवा उपलब्ध छ। रगत, कोलेस्टोरल, मिर्गौला, मुटु, दिशापिसाव, खकार, इसीजी जस्ता परीक्षणहरू समेत उपलब्ध छन्।
अस्पतालका सेवा व्यवस्थित र विस्तार भएपछि बिरामीको चाप बढ्दै गएको नगरपालिकाका प्रमुख अर्जुन माबुहाङले बताए । अस्पतामाल बीमा फार्मेसी समेत सञ्चालनमा छ भने दुई वटा एम्बुलेन्स समेत छन्। अस्पतालमा भिडियो एक्स-रे र डिजिटल एक्स-रे मेसिनहरू समेत सञ्चालनमा छन्।
‘अस्पताललाई हामीले सकेसम्म सुविधायुक्त बनाउने प्रयत्न गरेका छौँ। पछिल्लो समय बिरामीको चाप पनि बढ्दो छ,’ मेयर माबुहाङले भने।
उनका अनुसार हाल अस्पतालको क्षमता ५ देखि १० बेडको मात्रै हो। तर आवश्यकता पर्दा १५ जनासम्म बिरामीलाई समेत उपचार सेवा दिइएको छ। आवश्यकताअनुसार १५-१५ दिनमा विशेषज्ञ चिकित्सकहरूलाई समेत सेवा प्रदानका लागि झिकाउने गरिएको छ। यहाँ तेह्रथुमसहित ताप्लेजुङ, धनकुटा र संखुवासभाका बिरामीहरू आउने गरेका छन् ।
अस्पताललाई क्रमश: सेवा विस्तार गर्दै शल्यक्रिया सेवासम्मको सुविधा थप गर्ने उद्देश्य रहेको मेयर माबुहाङले बताए।
